
大宝伏藏TD2971བླ་མ་ནོར་ལྷའི་སྐོང་བ་ཚེ་གཡང་དངོས་གྲུབ་འཁྱིལ་བ་ཞེས་བྱ་བ་བཞུགས་སོ། །
74-169-1a
༄༅། །བླ་མ་ནོར་ལྷའི་སྐོང་བ་ཚེ་གཡང་དངོས་གྲུབ་འཁྱིལ་བ་ཞེས་བྱ་བ་བཞུགས་སོ། །
༄༅། །བླ་མ་ནོར་ལྷའི་སྐོང་བ་ཚེ་གཡང་དངོས་གྲུབ་འཁྱིལ་བ་ཞེས་བྱ་བ་བཞུགས་སོ། །ཧཱུྃ་ཧྲཱིཿ བསོད་ནམས་ཡོངས་རྫོགས་སྦྱིན་པའི་ཕར་ཕྱིན་ལས། །བསོད་ནམས་འདོད་དགུའི་དངོས་གྲུབ་ཆར་འབེབ་པའི། །བསོད་ནམས་སྟོབས་ཀྱི་འདོད་འཇོའི་བུམ་པ་བཟང་། །མི་ཟད་འདོད་པར་འཇོ་བའི་དགའ་སྟོན་གྱིས། །རྩ་གསུམ་ནོར་ལྷ་རབ་འབྱམས་ཐུགས་དམ་བསྐང་། །རིགས་འདུས་པདྨ་སམྦྷའི་ཐུགས་དམ་བསྐང་། །གུ་རུ་སྐྱེས་མཆོག་ཚུལ་བཟང་༴ འགྱུར་མེད་སྐུ་ཡི་ནོར་བདག༴ ཡོན་ཏན་འདོད་དགུའི་ནོར་བདག་ཐུགས་དམ༴ འགག་མེད་གསུང་གི་ནོར་བདག༴ ལྷུན་གྲུབ་ཕྲིན་ལས་ནོར་བདག༴ སྟེང་ཕྱོགས་ལྷ་ཡི་ནོར་བདག༴ བར་ཕྱོགས་མི་ཡི་ནོར་བདག༴ འོག་ཕྱོགས་ཀླུ་ཡི་ནོར་བདག༴ བྱང་ཕྱོགས་གནོད་སྦྱིན་ནོར་བདག༴ གསེར་དངུལ་ནོར་དབྱིག་ནོར་བདག༴ ཅང་ཤེས་རྟ་ཡི་ནོར་བདག༴ ཟས་གོས་བཅུད་ཀྱི་ནོར་བདག༴ རྐང་བཞི་ཕྱུགས་ཀྱི་ནོར་བདག༴ སྒོ་སྲུང་རྒྱལ་ཆེན་སྡེ་བཞིའི༴ ཀུན་འཁྱིལ་ལྷ་མོ་མཆེད་གསུམ༴ ཞིང་སྐྱོང་སྨན་བཙུན་ལྷ་ལྔའི༴ གཏེར་སྲུང་ཁ་རག་ཁྱུང་བཙུན༴ བཀའ་སྡོད་དྲེགས་པ་སྡེ་ལྔའི་ཐུགས་དམ༴ མྱུར་མཛད་སྤུ་གྲི་གིང་ལྔའི༴ ཐུགས་དམ་དབྱིངས་སུ་བསྐང་ངོ་བྱིན་གྱིས་རློབས། །ཐུགས་དམ་གཉན་པོ་སྐོང་བའི་དམ་རྫས་ནི། །བཀྲ་ཤིས་རྫས་རྟགས་རྒྱལ་
74-169-1b
སྲིད་རིན་ཆེན་བདུན། །རྩ་བརྒྱད་སྟོང་སྦྱར་ཆགས་མེད་རཀྟའི་མཚོ། །སྣང་སྲིད་སྣོད་བཅུད་རྣམ་དག་བྷ་ལིང་ཏ། །ཐབས་དང་ཤེས་རབ་དབྱེར་མེད་བྱང་ཆུབ་སེམས། །རང་བྱུང་ལྷུན་གྲུབ་མཆོད་པས་ཐུགས་དམ་བསྐང་། །རང་རྒྱུད་དངོས་པོར་བཟུང་པ་མཐོལ་ལོ་བཤགས། །གཟི་བརྗིད་སྐུ་ཡི་དངོས་གྲུབ་ལུས་ལ་སྩོལ། །ཚངས་དབྱངས་གསུང་གི་དངོས་གྲུབ་ངག་ལ་སྩོལ། །བདེ་སྟོང་ཐུགས་ཀྱི་དངོས་གྲུབ་སེམས་ལ་སྩོལ། །རིག་རྩལ་ཡོན་ཏན་རྒྱས་པའི་དངོས་གྲུབ་སྩོལ། །ཕྲིན་ལས་དངོས་གྲུབ་བཀྲ་ཤིས་དཔལ་འབར་ཤོག །ཅེས་པ་ལྷོ་བྲང་རི་ཕུག་གི་གནས་འཛིན་པ་རྣམས་ཀྱིས་བསྐུལ་ངོར་ཞྭ་དམར་གྱི་ཆོས་སྒར་དུ་འདུལ་འཛིན་རཏྣས་སྤེལ་བ་བཀྲ་ཤིས་པར་གྱུར་ཅིག །སརྦ་དཱ་མངྒ་ལཾ།། །།


